Filippində qasırğa qurbanlarının sayı 27-ə çatıb

Filippində “Xaqupid” tayfunu qurbanlarının sayı 27 nəfərə çatıb. Ölkənin içərilərinə doğru irəliləyən tayfunun gücünün tədricən azaldığı bildirilir.

Vətəninfo.az  xəbər verir ki, zərər çəkənlərin əksəriyyəti tayfunun zərbəsini ilk qəbul edən Samar adasının sakinləridir. Fəlakətin birinci günündə burada küləyin sürəti saatda 210 kilometrə çatırdı.

Paytaxta yağıntılar şəklində təsir edən tayfun elə bir ciddi problem yaratmayıb. Təxliyə edilən sakinlərin əksəriyyəti artıq öz evlərinə qayıtmağa başlayıb. Manilada həyat adi axarına düşmək üzrədir.

Bununla belə, həlak olanların sayının arta biləcəyi də istisna edilmir. Bəzi uzaq əyalətlərlə rabitə kəsildiyi üçün oradan hələlik dəqiq məlumat almaq mümkün olmayıb.

Tərcümədə “qamçı” mənasını verən “Xaqupid” tayfunu bu fəsildə Sakit okeanda yaranan sayca 22-ci tropik siklondur.