XİN qalmaqallı rus milyarderin Qarabağa səfərini araşdırır

Bunu mətbuata açıqlamasında XİN-nin mətbuat xidmətinin rəhbəri Hikmət Hacıyev bildirib.
H.Hacıyev deyib ki, bu şəxs qeyri-qanuni şəkildə Azərbaycan Respublikasının işğal olunmuş ərazilərinə səfər edib və "Dövlət sərhədi haqqında" Azərbaycan Respublikasının qanununu pozub: "Müvafiq prosedurlara əsasən aparılan araşdırmanın nəticəsinə uyğun olaraq bu şəxsin adı arzuolunmaz şəxslər siyahısına daxil ediləcək".

Qeyd edək ki, 90-cı illərin ortalarında öz ekstravaqant hərəkətləri ilə məşhurlaşan qalmaqallı rusiyalı milyarder German Sterliqov üç həftə əvvəl arvadı Alyonanı və beş uşağını götürərək Rusiyadan köçüb.

Virtualaz.org saytı dünən Rusiya mənbələrinə istinadən xəbər vermişdi ki, Sterliqov Azərbaycanın işğal altındakı ərazilərində - Qarabağda məskunlaşıb.

Məlum olub ki, 48 yaşlı German Sterliqov Qarabağda artıq ekoloji təmiz məhsulların istehsalı üçün təsərrüfat yaratmağa başlayıb. Onun yaşayış yerini dəyişib Qarabağa köçməsinin səbəbini açıqlamırlar. Amma köməkçiləri deyib ki, Sterliqov həftədə bir dəfə onlara zəng edir, işlərlə maraqlanır, yeni tapşırıqlar verir.