"Bu gün xalqımızın milli oyanış və ictimai düşüncə tarixində əlamətdar hadisə sayılan mətbuatın yaranması, "Əkinçi” qəzetinin tarix səhnəsinə çıxmasının 140 ili tamam olur. Bu tarixi addımın atılması üçün biz bütün dövrlərin ən böyük azərbaycanlısı, elm, maarif və milli tərəqqinin əkinçisi Həsən bəy Zərdabiyə borcluyuq. O, 19-cu əsrin ikinci yarısında çoxluğun hələ də qəbilə və tayfa düşüncəsi ilə yaşadığı, ticarəti movcudluğun əsas şərti kimi qəbul edən bir cəmiyyətə ictimai göz verdi. Cəhalət, avamlıq və nadanlığın qaranlıq küllüklərində eşələnən qövmə bir işıq gətirdi, yol göstərdi, onun üzünü dünyaya – təhsilə, maarif və mədəniyyətə tərəf çevirdi, "tərəqqi etməyən millətlər başqalarının qulu olacaqdır” dedi.

Ona görə də bu gün qul olmayan, azad düşüncəsi və işıqlı qələmi ilə bu milləti başqalarına qul olmağa qoymayan, milli ruhu diri saxlayan, bu peşənin ləyaqətini qoruyan, ona hörmət gətirən əsl jurnalistlərin bayramıdır. Mən ildən-ilə sayı azalan belə jurnalistləri ürəkdən təbrik edirəm. Zərdabinin adından sui-istifadə edib onun ruhunu incidən, gerçəyi görməyən və ya görmək istəməyən, qələmi tüfəngə çevirib bu millətin dəyərli övladlarına atəş açan, mənəviyyatca onlardan qat-qat üstün və güclü olanlara çamur atan, jurnalistikanı təbliğata qurban verən, medianı riyakarlıq, məslək və mənəviyyat alverinə çevirən, qazanc və mənsəb alətinə çevirən vücudlarla işimiz yoxdur. Belələri həmişə olub (bəxtimizdən bizdə daha çoxdur) və yenə də olacaqlar. 

Tarixdə iz qoymuş millətlər həmişə sayına yox, ağllarına güvəniblər. Mətbuatda da, jurnalistikada da say, kəmiyyət önəmli deyil, meydanda 10 nəfər varsa, deməli gerçək jurnalistika yaşayır, nöqsanları tənqid edir, gerçəyi deyir, korrupsiyaya vətən deyənlərin, maskaları yırtır, həqiqəti deməyi özünün əsas missiyası sayır. Bu gün həmin istedadlı və cəsur jurnalistlərin, onlarla eyni düşüncədə olan ləyaqətli insanların bayramıdır."

Moderator.az