"Hələ də bəzi yerlərdə bütpərəstlik mövcuddur"

Vətəninfo.az sia.az-a istinadən xəbər verir ki, bu gün Azərbaycan Respublikasının Dini Qurumlarla İş üzrə Dövlət Komitəsi və Mətbuat Şurasının birgə təşkilatçılığı ilə "Milli-mənəvi dini dəyərlər: tarixilik, müasirlik" adlı dəyirmi masa keçirilib. SİA-nın verdiyi xəbərə görə, tədbirdə Dini Qurumlarla İş üzrə Dövlət Komitəsinin sədri Mübariz Qurbanlı, Mətbuat Şurasının sədri Əflatun Amaşov, ölkə mediasının baş redaktorları və KİV nümayəndələri iştirak ediblər. 

Tədbirdə çıxış edən MŞ-nın sədri Əflatun Amaşov dövlət qurumları rəhbərlərinin mütəmadi olaraq baş redaktorlarla görüşlər keçirdiyini vurğulayıb.

Komitə sədri Mübariz Qurbanlı isə çıxış edərək bildirib ki, bu gün Azərbaycanda mətbuatın, televiziyanın rolu böyükdür: "Biz qurum olaraq mətbuata çox açığıq. İslam dini dünyada ikinci yerdədir. Son araşdırmalar islam dininə inananların sayının getdikcə artdığını göstərir. Biz klassik islam ölkəsiyik. Lakin hələ də bəzi yerlərdə bütpərəstlik mövcuddur".