Sabah keçiriləcək "Qarabağ” - "Anderlext” qarşılaşması ilə əlaqədər Bakı Metropoliteni gecə saat birə qədər işləyəcək.

Vətəninfo.az-ın "Qafqazinfo”ya istinadən xəbərinə görə, bu barədə Bakı Metropolitenin mətbuat xidmətinin rəhbəri Nəsimi Paşayev məlumat verib.

O qeyd edib ki, "Qarabağ” komandasının sabah "Anderlext” klubu ilə keçirəcəyi oyunun gecə saat 12-də bitəcəyi üçün klub metronun bağlanış saatının artırılması ilə bağlı Bakı Metropoliteninə müraciət edib: "Bakı Metropoliteni də onların xahişini nəzərə alaraq metronun saat 1-ə qədər işləməsinə qərar verib.

Amma futbolseverlər nəzərə almalıdır ki, "Gənclik” metrostansiyası Tofiq Bəhramov adına stadiona yaxın olduğu üçün orada sıxlıq olacaq. Ona görə də təhlükəsizlik tədbirləri ilə əlaqədar biz sərnişinləri metroya hissə-hissə buraxacağıq. Ona görə də sərnişinlərdən xahiş edirik ki, onlar "Gənclik” metro stansiyasına yaxın olan "28 May” və " Nəriman Nərimanov” stansiyalarından da istifadə etsinlər”.