SOS! Kiyevdə içməli suya zəhər qatıla bilər

Kiyevin meri Vitali Kliçko şəhərin mərkəzləşdirilmiş su təchizatı sisteminin diversiyaya məruz qalmasından ehtiyatlanaraq xüsusi komissiyanın yaradılmasına dair sərəncam imzalayıb. Ukrayna mətbuatı xəbər verir ki, son üç ayda vaxtaşırı olaraq şəhər sakinlərinə suyun zəhərləndirilməsinə dair anonim zənglər daxil olur.“Kiyevsukanalı” müəssisəsinin informasiya siyasəti məsələlərinə dair müşaviri Viktoriya Yakovleva bildirib ki, mənzilləri gəzən naməlum şəxslər sakinləri suyun zəhərləndirildiyinə inandırmağa çalışırlar. Buna görə də su təchizatı sistemi xüsusi nəzarətə götürülüb və hərbçilər tərəfindən qorunur: “Tez-tez suyun analizi aparılır. Su heç zaman bu qədər yoxlanılmayıb. Gün ərzində 1000-dən artıq nümunə götürülür. Nümunələr müxtəlif yerlərdən götürülərək laboratoriyalarda analiz edilir”.