AZAL futbol klubu ölkə çempionatlarında 100-cü dəfə məğlub olub

Futbol üzrə Topaz Premyer Liqasının beşinci turunun "İnter”lə ev oyununda 0:1 hesabı ilə uduzan AZAL ölkə çempionatlarında 100-cü dəfə məğlub olub.

Peşəkar Futbol Liqasından  bildiriblər ki, yüksək liqada 2005-ci ildə debüt edən paytaxt təmsilçisi keçirdiyi 303-cü qarşılaşmada bu uğursuzluğa üzülüb. Hesabında 113 qələbə və 90 heç-heçə olan bakılılar həm də antirekorda imza atıblar. Belə ki, AZAL əvvəlki 4 turda olduğu kimi yenə də quru hesabla uduzub. İlk 5 qarşılaşmada qol vurmayan və xal qazanmayan paytaxt təmsilçisi Azərbaycan çempionatlarının ilk belə uğursuzu olub. 1992-ci ildən keçirilən ölkə çempionatları tarixində 1-ci dəfədir bir komanda mövsümün ilk 5 oyununda nə qol vurur, nə xal qazanır.

AZAL-a qədər 2 klub ilk 5 oyunda qol vurmayıb. Lakin həmin komandalar xal qazanmağa nail olub. Startda hansısa komandanın qol vurmaması sonuncu dəfə 11 il əvvəl qeydə alınmışdı.

AZƏRTAC