Azərbaycanlı iş adamının $1 milyonluq maşını müsadirə olundu - FOTO

Türkiyədə yaşayan soydaşımıza gözlənilməz maliyyə zərbəsi

Belarusun Qomel vilayətinin iqtisad məhkəməsi Türkiyədə yaşayan Azərbaycan vətəndaşına məxsus “Rolls-Royce” avtomobilini müsadirə edib.

Anspress-in məlumatına görə, yenisi İstanbulda təxminən 1 milyon dollara satılan avtomobilin sahibi özü Türkiyəyə təyyarə ilə uçub və “Rolls-Royce” avtomobilini də Rusiyadan nəqletmə şirkəti ilə yola salıb. Avtomobil 19 fevral 2015-ci il tarixdə "Novaya Quta" gömrük məntəqəsinə yük maşınının yedəyində daxil olub. Gömrük məntəqəsi avtomobili daşıyan şirkətin CMR qaiməsinin olmadığını əsas gətirərək 30 baza ölçüsü dəyərində cərimə kəsib və avtomobilin müsadirəsi barədə qərar verib.

İş iqtisad məhkəməsinə verilib. Məhkəmə də Azərbaycan vətəndaşına məxsus “Rolls-Royce”un müsadirə olunması barədə qərarı dəstəkləyib. Sadəcə, nəqliyyat şirkətinin cərimə ilə yanaşı, avtomobilin dəyəri mislində cəriməni Belarus dövlət büdcəsinə ödənməsini tələb edib. Pul ödənilənə qədər avtomobil Belarusda cərimə meydançasında gözləməlidir.

Nəqliyyat şirkətinin vəkili isə Belarus qanunlarının Azərbaycan vətəndaşına şamil edilmədiyini, buna görə də yuxarı instansiya məhkəməsinə müraciət edəcəklərini bildirib.