İki avtobus toqquşdu: yaralılar var

Bu gün Bakının Sabunçu rayonunda iki sərnişin avtobusu bir-birinə çırpılıb. Vətəninfo.az xəbər verir ki,  Bakı Sərnişinnəqliyyat Məhdud Məsuliyyəti Cəmiyyətindən ANS PRESS-ə verilən məlumata görə, hadisə səhər saatlarında qeydə alınıb.
Sabunçu rayonu, Bakıxanov qəsəbəsi, "Komsomolski" dairəsi adlanan ərazidə Mərdəkandan şəhərə gələn 100 saylı, "Daewoo" markalı, 10 TY 274 nömrə nişanlı avtobusla "Hyundai" markalı avtobus toqquşub.
Qəza nəticəsində sərnişin avtobusunda 4 sərnişin yaralanıb. Yaralılar xəstəxanaya yerləşdiriliblər.
Qeyd edək ki, qəzaya uğrayan "Hyundai" markalı avtobus Heydər Əliyev Beynəlxalq Aeroportuna məxsus olub.
Faktla bağlı araşdırma aparılır.