Macarıstanda “Gəncə-2016” Avropa Gənclər Paytaxtının təqdimatı olub

"Gəncə-2016” Avropa Gənclər Paytaxtının növbəti təqdimatı Macarıstanda keçirilib.

Avropa Komissiyasının "Erasmus plus” proqramı çərçivəsində reallaşan "Avropa üçün aktiv gənclərə” (With astive youth for Europa) adlı beynəlxalq layihədə Macarıstan, Rumıniya, Serbiya, Slovakiya, Ukrayna, Albaniya, İtaliya, Kosovo, Litva ilə yanaşı, Azərbaycan gəncləri də iştirak ediblər.

Vətəninfo.az AZƏRTAC-a istinadla xəbər verir ki, tədbirdə ölkəmizi "Odlar Yurdu” Gənclər İctimai Birliyinin üzvləri təmsil ediblər. Layihə çərçivəsində Nyiregyhaza şəhərində təşkil olunan "Azərbaycan gecəsi”ndə ölkəmizdə uğurla keçirilən ilk Avropa Oyunlarından söz açılıb, Azərbaycan mədəniyyətini, mətbəxini əks etdirən təqdimatlar keçirilib.

Sonra "Gəncə-2016” Avropa Gənclər Paytaxtına dair videoçarx nümayiş etdirilib.

Aparılan müzakirələrdə Azərbaycanda dövlət səviyyəsində həyata keçirilən gənclər siyasəti, bu sahədə qazanılan uğurlardan danışılıb.