Prezident söz verdi: Həbsxana bağlanacaq

ABŞ prezidenti Quantanamo həbsxanasının bağlanması üçün əlindən gələni edəcəyini bildirib.

Vətəninfo.az-ın məlumatına görə, CNN kanalına müsahibəsi zamanı Barak Obama sözügedən həbsxananın terrorçuluğu təşviq etdiyini söyləyib. O, ABŞ-ın bu cəza müəssisəsinə milyonlarla dollar sərf etdiyini və bunun Amerika dəyərlərinə zidd olduğunu deyib.

Dünən ABŞ-ın Müdafiə Nazirliyi 4 əfqan məhbusun azad edildiyini bəyan edib.

Obama hakimiyyətə gələn zaman Quantanamoda 242 məhbus saxlanılırdı. Hazırda onların sayı 132 nəfərdir.

Məhbusların bir çoxu azadlığa buraxılmalıdır. Lakin vətənlərinə dönə bilmədikləri üçün onların sərbəst buraxılması yubadılır. Onların yarıdan çoxu yəmənlidir.

Quantanamo 2002-ci ildə "Əl-Qaidə"nin 11 sentyabr terror aksiyalarından sonra açılıb. İnsan hüquqları müdafiəçiləri dəfələrlə ABŞ-ı insanları ittihamsız və ağır dindirilmə şərtləri altında saxladığına görə tənqid edib.