Prezidentin müşavirləri Borçalıda vərəqələr paylayacaq

Gürcüstan Prezidentin müşaviri tələbələrlə görüşüb

Gürcüstan Prezidentinin  milli azlıqların məsələləri üzrə müşaviri Sofiya Şamanidi və beynəlxalq münasibətlər üzrə müşaviri İvane Maçavariani ölkənin ali məktəblərində təhsil alan azərbaycanlı tələbələrlə görüşüb. Vətəninfo.az xəbər verir ki, onlar gənclərə Avropaya inteqrasiya prosesləri, Gürcüstanın Avropa İttifaqı ilə Assosiasiya Sazişini imzalaması, ölkənin bundan əldə edəcəyi fayda və başqa məsələlər barədə ətraflı məlumat veriblər.
Müşavirlər bununla əlaqədar ölkənin milli azlıqların məskunlaşdığı bölgələrində geniş təbliğat işləri aparılmasının vacibliyini qeyd edib və gənclərin buna cəlb olunmasının əhəmiyyətini vurğulayıblar.
İyunun sonunda Prezident Administrasiyasının nümayəndələri azərbaycanlı tələbələrlə birlikdə soydaşlarımızın yığcam yaşadıqları Kvemo Kartli-Borçalı bölgəsinə gedib sakinlərə ana dillərində bu məsələyə həsr olunmuş bukletlər paylayacaqlar.
Tələbələr görüşdən razı qaldıqlarını bildirib, bunun davam etdirilməsini arzulayıblar.

Vətəninfo.az