Prezidentin qızlarını tənqid etdiyi üçün istefa verdi

ABŞ-ın Tennesi ştatından respublikaçı konqresmen Stiven Finçerin ictimaiyyətlə əlaqələr üzrə direktoru Elizabet Loten dekabrın 1-də istefa verib.

Məlum olub ki, E.Loten Şükranlıq günü münasibətilə Prezident Barak Obamaya hədiyyə olunan “hind toyuğunun əfv edilməsi” mərasimində onun qızları Saşa və Maliyanın davranışını Facebook səhifəsində kəskin tənqid edib. O, Facebook-da prezidentin qızlarına müraciət edərək yazıb:” Əziz Saşa və Maliya. Mən başa düşürəm ki, siz çətin yaş dövründəsiniz. Amma siz Birinci Ailənin bir hissəsisiniz. Çalışın, buna uyğun hərəkət edəsiniz. Ən azı oynadığınız rola hörmətlə yanaşın”. O, prezidentin qızlarına ictimai teleefirlərdə “ağız-burun əyməməyi” məsləhət görüb.

Prezidentin qızlarının xarici görkəmi və davranışı ilə bağlı Elizabet Lotenin şərhləri sosial şəbəkələrdə böyük tənqid dalğası doğurub. Üzr istəmək məcburiyyətində qalan E.Loten müraciətini silməli olub və sonunda istefa verib. Ağ Evin mətbuat xidmətinin nümayəndəsi Coş Ernest baş verənlər ilə bağlı deyib ki, Elizabet Lotenin prezidentin qızlarına münasibətdə davranışı onu çox təəccübləndirib. O vurğulayıb ki, dövlət idarələrinin nümayəndələri və siyasətçilər dedikləri sözlərinə diqqətlə yanaşmalıdırlar.