Prokuror Suriyadan qayıdanların hərəsinə 15 il iş istədi

Dövlət ittihamçısı Suriyada hərbi təlim keçməkdə ittiham olunan 6 gəncin 15 il müddətinə həbs olunmasını istəyib.

Proses mayın 25-də Ağır Cinayətlər Məhkəməsində keçirilib.
Vəkil Elmar Süleymanovun AzadliqRadiosuna verdiyi məlumata görə, prosesdə vəkillər müdafiə çıxışı ediblər:
«Biz bildirdik ki, bu cinayət işində gənclərin cinayətini təsdiq edən heç bir mötəbər sübut yoxdur. Onların Suriyaya getməkləri hələ o demək deyil ki, onlar «İslam Dövləti» qruplaşmasına qoşulublar. İttiham olunanlardan Tural Həsənovun gözünün göstəricisi 7-dir. Bu o deməkdir ki, Tural eynəksiz öz barmaqlarını belə görə bilmir. Belə olan halda o, necə döyüşdə iştirak edə bilər».
Vəkilin dediyinə görə, bu cür cinayət əməlinə görə Suriyada ən çox 7 il həbs cəzası verilir. Belə olan halda prokurorun 15 il cəza istəməsi də anlaşılan deyil:
«Bizim qanunvericiliyə görə, xarici ölkə ərazisində törədilmiş cinayətlə bağlı müəyyən edilmiş cəza həmin ölkədə müvafiq cəzadan ağır ola bilməz. Bütün bu halları təhlil edəndə görürük ki, məhkəmə çox çətin vəziyyətə düşüb. Ortada heç bir sübutu olmayan cinayət işi var. Elmar Süleymanov deyir ki, məhkəmədə müdafiə etdikləri şəxslərə bəraət verilməsini istəyirlər».
Növbəti proses mayın 29-na təyin olunub ("Azadlıq" radiosu).