Qaçqın düşərgəsi bombalandı - Suriyada

Suriya ordusuna məxsus vertolyotlar ötən gün paytaxt Dəməşq ətrafındakı müxtəlif nöqtələrə 28 “barrel bombası” atıb. SİA-nın Türkiyə mətbuatına istinadən verdiyi xəbərə görə, Suriyanın Yermuk, Hacərül Əsvəd, Tadamun bölgəsi bombalı hücuma məruz qalıb. Yermuk qaçqın düşərgəsində yaşayan Mustafa Əbu Ubeydənin sözlərinə görə, düşərgə sakinləri hücumlardan xeyli ziyan çəkib. Paytaxtın cənubunda yaradılan və 3 ildən bu yana Dəməşq rəhbərliyinə bağlı qüvvələrin əhatəsində olan Yermuk qaçqın düşərgəsində ölkədəki vətəndaş müharibəsindən əvvəl 950 min insan yaşadığı halda, hazırda bu rəqəm 18 minə enib. Sözügedən düşərgədə əsasən Golan təpələrindən olan suriyalı və fələstinli qaçqınlar yaşayır.