"Mən Bakının belə gözəl olduğunu təsəvvür etmirdim"

Ötən gün Türkiyə komandasına bürünc medal qazandıran Elif Jale Yaşılirmak həm türklər, həm də azərbaycanlılar üçün əsl sürpriz etdi.

İdmançı döyüşün əvvəlində Belarus güləşçisinə uduzurdu. Ancaq güclü azarkeş dəstəyi və daxili inam hər şeyi bir anda dəyişdi. Məğlub olduğu halda, birdən-birə böyük xal fərqi ilə qələbə qazandı.
Döyüşdən sonra Elif deyib ki, məğlub olmaq heç ağlına da gəlmirdi.
"Çünki bilirdim ki, bu medal komandaya lazımdır. Mən zədəli idim, güləşmək olmazdı mənə. Həkim icazə vermirdi ki, xalçaya çıxım. Ancaq şükürlər olsun Allaha ki, hər şey yaxşı keçdi. Azarkeşlərin dəstəyi inanılmaz idi. Hər kəsə təşəkkür edirəm ki, belə dəstək verdilər mənə. Çünki azarkeşlərin dəstəyi güclü enerji verirdi. Mənə çox kömək etdilər", - əlavə edib.
Azərbaycana ilk dəfədir ki, gəldiyini deyən idmançını paytaxt Bakı heyran edib: "Mən Bakının belə gözəl olduğunu təsəvvür etmirdim. Mənimlə Bakıdan bir oğlan da məşq edir. Bu gün axşam məni şam yeməyinə evlərinə dəvət ediblər. Həm şam edəcəyik, həm də şəhərdə gəzəcəyik. Sabah isə geri qayıdırıq".
Elif deyir ki, əsl adı Yuliyadır və İsveçdə yaşayır. Türkiyə komandasında çıxış etdiyi üçün istəyib ki, azarkeşlər onu türk adı ilə tanısınlar. Bu səbəbdən də adını dəyişərək Elif qoyub.

Milli.Az