“Yaxın Şərqin mirvarisi” məhv edilə bilər

İŞİD yaraqlıları Suriyanın qədim şəhərlərindən birini, “Yaxın Şərqin mirvarisi” sayılan Palmiranı ələ keçiriblər. UNESCO-nun Dünya İrsi siyahısına daxil edilən bu şəhəri İŞİD tərəfindən İraqda məhv edilən minillik Assuriyanın aqibəti gözləyir.

Vətəninfo.az-ın məlumatına görə, AZƏRTAC Vesti.ru saytına istinadla xəbər verir ki, uzun sürən döyüşlərdən sonra Ramadı şəhərini ələ keçirən İŞİD İraqın paytaxtı – Bağdada yaxınlaşıb və şəhərə hücum etməyə hazırlaşır.
ABŞ-ın Müdafiə Nazirliyi növbəti dəfə çarəsizliyin simvoluna çevrilən yeni hava zərbələri barədə məlumatlar verir. Zərbələr əsasən qruplaşmanın İraq müharibəsi zamanı ən uğurlu qələbələrini qazandığı və hazırda mövqelərini gücləndirdiyi Ramadi şəhərinə endirilir. Yaraqlıları dayandırmağa təkcə hava zərbələrinin kifayət etməyəcəyini anlayan ABŞ İraqa təcili surətdə tank əleyhinə komplekslər göndərməyə başlayıb.
İraq paytaxtında isə İŞİD-ə qarşı əks-hücuma hazırlaşırlar. Bunun üçün orduya zaman və yeni qüvvələr lazımdır. Müdafiə nazirliyi təcili şəkildə şiələrdən təşkil olunmuş könüllü dəstələr toplayır.
İŞİD Suriyada da hücumlarını genişlədir. Yaraqlıların qərb qruplaşmasının Palmira şəhərinə hücumlarına tab gətirməyən ordu hissələri şəhərin kənarına çəkilməyə məcbur olub.
UNESCO isə öz növbəsində Dünya İrsi siyahısına salınmış unikal abidənin dağılmasının qarşısını almaq üçün tərəfləri atəşi dayandırmağa səsləyib.