ƏHD Partiyasının sədri, millət vəkili Qüdrət Həsənquliyev hüquq-mühafizə orqanları rəhbərlərinin də qatıldığı konfrans haqqında danışıb. 

Q.Həsənquliyevin sözlərinə görə, 2026-cı ilin büdcəsində ölkəmizdə beynəlxalq səviyyəli tədbirlərin keçirilməsi üçün xərclərə 239 milyon manat ayrılması nəzərdə tutulub: ”Bu olduqca böyük vəsaitdir. Bu vəsaitin həcmi bir neçə dəfə azaldılmalı, qənaət olunan vəsait bizi qürurlu etmiş Silahlı Qüvvələrin hərbçilərinin mənzil problemlərinin həllinə sərf olunmalıdı. Sərf olunan vəsaitlər qarşılığında qeyd etdiyiniz konfransın və bu kimi digər konfransların həm təbliğat effekti, həm də hüquqi dövlət quruculuğuna təsiri çox azdır. O konfransda hansısa ciddi təkliflərin olması və gələcəkdə hüquq islahatları çərçivəsində onların nəzərə alınması ehtimalı sıfıra yaxındı. Ona görə ki, bu tipli tədbirlərə müstəqil mövqeyi olan hüquqşünaslar yox, yalnız rəsmi şəxslər çağırılır, onlar da bir qayda olaraq mövcud konstitusiyanı tərifləyir, hüquq sistemimizdəki çatışmazlıqlardan danışmırlar".

Millət vəkli vurğulayıb ki, ölkəmizdə hakimiyyət bölgüsünə real məzmun, hüquq və azadlıqlara ciddi təminat verən yeni konstitusiya qəbul olunmalıdır.