Yunus Oğuzun “Əmir Teymur” kitabı qırğız dilinə tərcümə edilir

Yazıçı-publisist, tarixi romanlar müəllifi Yunus Oğuzun “Əmir Teymur zirvəyə doğru” və “Əmir Teymur dünyanın hakimi” ikicildliyi qırğız dilinə tərcümə olunur. Bu barədə “OLAYLAR”-a məlumatı Qırğızıstanda fəaliyyət göstərən Türkdilli Dövlətlərin Siyasətinə Dəstək Fondunun prezidenti Nüsrət Məmmədov verib. Bildirib ki, “Tamerlan” adı altında işıq üzü görəcək kitabın tərcüməsi yaxın günlərdə başa çatacaq: “Kitab Türkdilli Dövlətlərin Siyasətinə Dəstək Fondunun dəstəyi ilə tərcümə olunur. Kitab qırğız dilinə  Mukan Asanaliyev və Bekten Dıykanbayev tərəfindən tərcümə olunur”. Kitabın təqdimat mərasiminin gələn ilin ilk aylarında Qırğızıstanda keçirilməsi nəzərdə tutulub.

Qeyd edək ki, Yunus Oğuzun müəllifi olduğu həmin kitablar bir müddət əvvəl Türkdilli Dövlətlərin Siyasətinə Dəstək Fondu tərəfindən rus dilinə tərcümə olunaraq nəşr edilib. “Tamerlan” kitabının Bişkekdə keçirilən təqdimat mərasimində Yunus Oğuz da iştirak edib.