Üzülməyin, AMACİ-ni izləyəcəksiniz

Xəbər verdiyimiz kimi, Azərbaycan telekanallarında əcnəbi serialların yayımı üçün Milli Televiziya və Radio Şurasının (MTRŞ) qoyduğu müddət bu gün başa çatır. Sabahdan ölkə telekanallarında əcnəbi serialların yayımı dayandırılacaq.

“Space” televiziyası isə Azərbaycanda izlənmə rekordu qıran “Bu zalım dünyada doğulma!” serialını fərqli formatda təqdim edəcək.

Kanal, sabahdan etibarən “Kim haqlıdır?” adlı televiziya layihəsinə başlayır. Mənbənin sözlərinə görə, həftə içi hər gün “Bu zalım dünyada doğulma!” serialının saatında yayımlanacaq verilişin aparıcısı Mikayıl Güləddinoğludur.

Verilişin formatı isə, sırf serialın üzərində qurulub. Verilişdə, Amaci və Siyanın azərbaycanlı vəkilləri olacaq. Hər verilişdə serialın yeni bölümündən sujetlər veriləcək və burada kimin haqlı olub-olmaması müzakirə ediləcək. Tamaşaçılar da burada aktiv iştirak edə biləcəklər. SMS-lər vasitəsi ilə serialın unudulmaz qəhrəmanları Amaci və ya Siyanın haqlı olub-olmamasını müəyyənləşdirəcəklər.

Qeyd edək ki, Amacinin vəkili Mehriban Xanlarova, Siyanın vəkili isə Könül Yusifqızıdır.

Məsələ ilə qarşı tərəfin fikrini verməyə çalışdıq. Lakin dəfələrə “Space” ilə əlaqə saxlasaq da, rəhbərlikdən heçkim yerində olmadı. 

Oral MƏDƏNÇİ