"QURAN"I TƏHQİR EDƏNİ DİRİ-DİRİ YANDIRDILAR

Pakistanda hiddətlənmiş kütlə polis məntəqəsinə hücum edərək, "Quran"ı təhqir etməklə şübhəli bilinən şəxsi diri-diri yandırıb. Musavat.com xəbər verir ki, məlumatı Reuters agentliyi hüquq-mühafizə orqanlarına istinadən yayıb.

Yandırılan kişi səyahətçi olub. O, cümə gününə keçən gecəni Sindx əyalətindəki məscidlərdən birində keçirib. Səhər isə həmin məsciddə yandırılmış "Quran" tapılıb.

"O, gecəni məsciddə tək olub. Orada bu rəzil hərəkəti edəcək başqa adam yox idi", - məscidin imamı deyib.

Kənd sakinləri əvvəlcə kişini döyüblər, sonra isə polisə təhvil veriblər. Lakin bir neçə saat sonra təxminən 200 adam polis məəntəqəsinə hücum edib. Onlar şübhəlini bayıra çıxarıblar və yandırıblar.

Hadisəni törətməkdə şübhəli bilinən 30 nəfər saxlanılıb.