01 avqust 2015-ci il tarixdə  Biləsuvar rayon Heydər Əliyev Mərkəzində Azərbaycanın müstəqilliyi və ərazi bütövlüyünün qorunması uğrunda gedən döyüşlərdə qəhrəmancasına  şəhid olmuş hərbi qulluqçularımızın təltif olunduqları medallar ailə üzvlərinə təqdim olundu.

Tədbirdə Biləsuvar rayon İcra Hakimiyyətinin başçısı Mahir Quliyev,  Azərbaycan Respublikası Müdafiə Nazirliyinin idarə rəisinin müavini Abdulla Qurbani, hüquq mühafizə orqanlarının rəhbərləri, rayon aktivi, ziyalılar,  gənclər,  müharibə veteranları və şəhid ailələlərinin üzvləri iştirak etdilər.

İştirakçılar əvvəlcə  Ulu Öndər  Heydər Əliyevin   abidəsini ziyatət edib, əziz xatirəsinə gül dəstələri qoydular.Tədbir dövlət himninin səslənməsi ilə başladı.

Biləsuvar Rayon İcra Hakimiyyətinin başçısı Mahir Quliyev çıxış edərək rayonda hərbi vətənpərvərlik tərbiyəsinə xüsusi önəm verildiyini, bu istiqamətdə işlərin davamlı xarakter aldığını bildirdi. Qeyd olundu ki, Biləsuvar rayonu Qarabağ uğrunda gedən döyüşlərdə 122 şəhid verib. 114 biləsuvarlı Qarabağ əlili statusu alıb. Adı dillər əzbəri olan cəsur döyüşçü Mübariz İbrahimov isə ölümündən sonra Azərbaycanın Milli Qəhrəmanı adına layiq görülüb.

Azərbaycan Respublikasının Prezidenti,Ali Baş Komandan İlham Əliyev cənablarının rəhbərliyi altında Azərbaycan ordusu hər an öz sözünü deməyə hazırdır.Bü gün bizim güclü ordumuz var və bu ordu əmr verildiyi  zaman işğal altında olan torpaqlarımızı düşməndən azad edəcəkdir. Bu gün Azərbaycan əsgərinin nəyə qadir olduğu  gedən döyüşlərdə düşmənə vurduğu ağır zərbələr zamanı bir daha öz təsdiqini tapır.

M.Quliyev bildirdi ki,şəhidlərimiz və onların ailə üzvləri heç zaman unudulmayacaq və daima yüksək diqqət və qayğıyla əhatə olunacaqlar.Bunun bariz nümunəsi olaraq Azərbaycan Respublikasının  Prezidenti cənab  İlham  Əliyevin  24  iyun  2015-ci  il tarixli  Sərəncamı  ilə  Azərbaycan  Respublikasının  müstəqlilliyinin, ərazi  bütövlüyünün  qorunub saxlanılmasında  xüsusi  xidmətlərinə  görə,  xidməti  vəzifələrini və hərbi  hissənin  qarşısında  qoyulmuş  tapşırıqları  yerinə  yetirərkən  fərqləndiklərinə  görə  Azərbaycan  Silahlı  Qüvvələrinin  qulluqçuları  gizir  Pərvin  Səlahəddin  oğlu Əliyev  və    kiçik  gizir  Rahil  Əfsər  oğlu  Hüseynov  ölümündən  sonra  "Hərbi  xidmətlərə  görə”  medalları  ilə,  Milli  Ordumuzun  giziri  Şahmurad  Hilal  oğlu Əlizadə  Müdafiə  Nazirinin  əmri  ilə  ölümündən  sonra  "Hərbi  xidmətdə  fərqlənməyə  görə”  3-cü dərəcəli  medalı  ilə  təltif  olunmuşlar. Vətən uğrunda qurban gedən şəhidlərimiz daim ürəklərdə yaşayacaq və heç vaxt unudulmayacaqlar.

Tədbirdə  Müdafiə Nazirliyinin idarə rəisinin müavini, polkovnik Abdulla Qurbani  çıxış edərək dövlətimiz tərəfindən torpaqlarımızın müdafiəsi uğrunda şəhid olmuş hərbi qulluqçuların şücaətinin heç vaxt diqqətdən kənarda qalmadığını, onların ailə üzvlərinin qayğı və problemlərinin daim diqqət mərkəzində saxlandığını qeyd edib. Bildirilib ki, Azərbaycan Respublikasının müstəqilliyi, ərazi bütövlüyünün qorunmasında və hərbi hissənin qarşısında duran döyüş tapşırığını yerinə yetirərkən göstərdikləri döyüş şücaətinə görə 3 biləsuvarlı şəhid ölkə başçısının 24 iyun 2015-ci il tarixli sərəncamı ilə ölümlərindən sonra yüksək döyüş medalları ilə təltif olunublar.

Sonra  medallar şəhidlərin ailə üzvlərinə təqdim edilib. Şəhid gizir Pərvin Əliyevin ölümdən sonra təltif edildiyi "Hərbi xidmətlərə görə” medalını oğlu Riad, kiçik gizir Rahil Hüseynovun medalını isə anası Şahzadə Hüseynova qəbul edib. Şəhid gizir Şahmurad Əlizadənin ölümündən sonra layiq görüldüyü "Hərbi xidmətdə fərqlənməyə görə” 3-cü dərəcəli medalı onun anasına təqdim olunub.

Sonda çıxış edən şəhid ailələrinin üzvləri övladlarının məhz Vətən torpaqları uğrunda həlak olmaları ilə qürur hissi duyduqlarını, lazım gəldiyi təqdirdə özləri də silaha sarılaraq döyüşə atılacaqlarını bildirərək,onlara göstərilən bu yüksək diqqət və qayğıya görə ölkə Prezidenti Cənab İlham Əliyevə öz minnətdarlıqlarını bildirdilər.