Son günlər ölkədə dəhşətli ailə faciələri və məişət zəminində törədilən cinayətlər artmaqdadır. Belə ki, yanvarın 24-də Bakının Maştağa qəsəbəsində oğul anasını qətlə yetirib. Bir gün sonra isə daha sarsıdıcı hadisə Bakıda baş verib. Qəbələdə Rayon Məhkəməsinin sədri Abbas Əliyevin oğlu Emil Əliyev övladının gözü qarşısında həyat yoldaşına 20 bıçaq zərbəsi vurub. Hadisədən sonra o, həyatına son qoyub. Şəmkirdə isə 56 yaşlı kişi öz oğlu tərəfindən küt alətlə öldürülüb. 

Bu cür cinayət hallarının artmasına səbəb nədir?

Globalinfo.az-a danışan Sağlam Cəmiyyət Hərəkatının sədri, sosioloq Elçin Bayramlı deyib ki, son dövrlər cəmiyyətdə aqressivlik açıq şəkildə artır:

"İnsanlar arasında psixoloji gərginliyin, stressin və əsəbiliyin yüksəlməsi bu tendensiyanın həm məişət zəminində baş verən hadisələrdə, həm də ictimai yerlərdəki münasibətlərdə özünü göstərir. Belə vəziyyətin formalaşmasında bir sıra amillər rol oynayır və bu, təkcə yerli deyil, qlobal miqyasda müşahidə olunan yeni dövrün reallığıdır. Mövcud durumun əsas səbəblərindən biri mənəvi deqradasiyadır. Mənəvi dəyərlərin arxa plana keçməsi, psixoloji problemlərin və psixi xəstəliklərin artması cəmiyyətdə münasibətlərin gərginləşməsinə ciddi təsir edir. Uşaq tərbiyəsindən başlayaraq bir çox sahədə müşahidə olunan geriləmə də bu prosesin tərkib hissəsidir. Eyni zamanda insanlar arasında münasibətlərin getdikcə maddi maraqlar üzərində qurulması ailədaxili, dostluq və sosial əlaqələrdə müəyyən problemlər yaradır. Bu hallar bəzən əmlak münaqişələri, qarşılıqlı anlaşılmazlıq və şəxsi maraqların üstün tutulması səbəbindən ağır faciələrlə nəticələnir”.

 

Maştağada qətl: ana Ağayeva Həyat və oğul Ağayev Emil

Sosioloq bildirib ki, ailə münaqişələrinin bir hissəsi də mənəvi-əxlaqi səbəblərlə bağlıdır:

 

"Əxlaqsızlıq hallarının artması, ailə dəyərlərinin zəifləməsi və bu zəmində baş verən cinayətlər ümumi vəziyyəti daha da ağırlaşdırır. Nəticə etibarilə, bu proseslər həm kriminal vəziyyətin pisləşməsinə, həm də sosial münasibətlərin daha da gərginləşməsinə gətirib çıxarır. Ailə daxilində, dostlar arasında, iş mühitində və hətta gündəlik məişət münasibətlərində adi anlaşılmazlıqların belə ağır nəticələr doğurduğu hallara tez-tez rast gəlinir. Bu baxımdan cəmiyyətin sağlamlaşdırılması məqsədilə sistemli və məqsədyönlü iş aparılmalıdır. Mənəvi dəyərlər uşaqlıqdan təbliğ olunmalı, milli-mənəvi irsimiz qorunmalı və inkişaf etdirilməlidir. İnsanlara həyatın yalnız maddi ölçülərlə qiymətləndirilməməsi, insani və ailə münasibətlərinin milli dəyərlər üzərində qurulmasının vacibliyi aşılanmalıdır”.

Həyat yoldaşını bıçaqlayan Emil Əliyev 

Ekspert qeyd edib ki, son illər "müasirlik” və "azadlıq” adı altında ailə modeli və uşaq tərbiyəsində aparılan köklü dəyişikliklər bir çox hallarda mənfi nəticələrə səbəb olur:

"Cəmiyyətdə sosial münasibətlər elə qurulmalıdır ki, insanlar daimi stress və hüquq pozuntuları ilə üzləşməsin. İş və sosial mühitdə gərginliyin azaldılması, əxlaqsızlığın və mənəviyyatsızlığın yayılmasının qarşısının alınması sağlam münasibətlərin formalaşmasına şərait yaradar. Bütün bu amillər birgə şəkildə cəmiyyətin mənəvi və psixoloji baxımdan sağlam olmasını təmin edən əsas faktorlardır. Əgər bu sahələrdə deqradasiya davam edərsə, onun təsirləri sosial həyatda, kriminal vəziyyətdə və psixi problemlərin artmasında daha qabarıq şəkildə özünü göstərəcək. Buna görə də həm milli-mənəvi, həm də sosial müstəvidə sağlam cəmiyyətin formalaşdırılması üçün ardıcıl, məqsədyönlü dövlət və ictimai siyasət həyata keçirilməlidir”.