“Biz teatrı sevirik”

Azərbaycan Dövlət Gənc Tamaşaçılar Teatrında “Biz teatrı sevirik” layihəsi çərçivəsində növbəti tədbir keçirilib. Teatrın mətbuat xidmətindən “Vətəninfo.az”a verilən məlumata görə, tədbiri teatrın direktoru,  ASSİTEJ-Azərbaycan Milli Mərkəzinin prezidenti Mübariz Həmidov açaraq, layihənin həyata keçirilməsinin əsas məqsədləri haqqında fikirlərini bölüşüb. Gənclərin dünyagörüşlərinin formalaşmasında səhnə əsərlərinin əvəzsiz rolu olduğunu qeyd edən M.Həmidov “Biz teatrı sevirik” layihəsinin də məhz bu məqsədlə reallaşdırıldığını vurğulayıb.

Daha sonra M.Həmidov Azərbaycan Dövlət Gənc Tamaşaçılar Teatrının təbliği, uşaq və gənclərdə teatra maraq hissinin aşılanmasında fəal iştiraklarına görə, F.Köçərli adına Respublika Uşaq Kitabxanasının direktoru Fizurə Quliyeva və 53 saylı orta məktəbin direktoru Firəngiz Həsənovaya teatrın fəxri diplomlarını təqdim edib. 

Tədbirdə Azərbaycan İctimai-Siyasi Universitetin professor, müəllim və tələbə kollektivi, F.Köçərli adına Respublika Uşaq Kitabxanasının, 53 saylı orta məktəbin əməkdaşları, Dünya Azərbaycanlıları Mədəniyyət Mərkəzinin “Bura Vətəndir” məclisinin üzvləri, Bilgəhdəki müharibə və əlillər pansionatının sakinləri, ziyalılar və mətbuat nümayəndələri iştirak ediblər.

Tədbirdən sonra görkəmli dramaturq Ə.Haqverdiyevin “Pəri Cadu” tamaşası nümayiş etdirilib.

Mirvari Nəcəf