“Bu, Azərbaycan Konstitusiyasına ziddir”

“Azərbaycanda siyasi partiyaların inkişafının qarşısını alan əngəllər mövcuddur”.

“Vətəninfo.az” "Qafqazinfo”-ya istinadən xəbər verir ki, bu sözləri Ədalət Partiyasının sədri, Milli Məclisin deputatı İlyas İsmayılov bildirib. O söyləyib ki, sözügedən əngəllərdən biri də maliyyə məsələsi ilə bağlıdır. “Siyasi partiyalar haqqında” qanuna edilən dəyişikliklərdə siyasi partiyaların dövlət büdcəsindən maliyyələşməsi nəzərdə tutulub.

İ.İsmayılov deyib: “Mən bunu müsbət qiymətləndirirəm. Amma “Siyasi partiyalar haqqında” qanuna edilən dəyişikliklərdə xoşagəlməz məqamlar da mövcuddur. Bu məqamlardan biri odur ki, məhkəmə qərarı çıxmamışdan əvvəl siyasi partiyanın fəaliyyəti hər hansı icra stukturu tərəfindən dayandırıla bilər. Bu, Azərbaycan Konstitusiyasına zidd müddəadır və mən bunun əleyhinəyəm. Digər yalnış məqam odur ki, müharibə təbliğatı aparmaq olmaz. Hesab edirəm ki, hazırda Ermənistan ilə müharibə şəraitində olan Azərbaycanda müharibə təbliğatı olmalıdır. Çünki, bu məqamdan kimlərsə su-istifadə edə bilərlər”.

Xatırladaq ki, bu gün keçirilən Milli Məclisin Hüquq siyasəti və dövlət quruculuğu komitəsinin iclasında “Siyasi partiyalar haqqında” qanuna edilən dəyişikliklər müzakirə olunub.