Əlcəzair Futbol Federasiyası cərimələndi

Vətəninfo.az xəbər verir ki, Beynəlxalq Futbol Assosiasiyaları Federasiyası (FİFA) Əlcəzair Futbol Federasiyasını 50 min İsveçrə frankı məbləğində cərimə edib.

Bu tədbir dünya çempionatının qrup mərhələsinin üçüncü turunda Rusiya komandası ilə matç zamanı (bu görüş 1:1 hesabı ilə başa çatıb) əlcəzairli azarkeşlərin davranışına görə tətbiq edilib.

Keçən həftə cümə gününə keçən gecə olmuş həmin görüşün yekunlarına əsasən Rusiya yığması dünya birinciliyində mübarizəni dayandırıb. Matçın 6-cı dəqiqəsində Aleksandr Kokorinin vurduğu qol sayəsində rusiyalılar hesabda irəli çıxıblar. 60-cı dəqiqədə cərimə zərbəsindən sonra əlcəzairlilər hesabı bərabərləşdirməyə müvəffəq olublar. Akinfeyev topu tutmaq üçün irəli çıxanda büdrəyib, bundan sonra İslam Slimani topu boş qapıya vurub.

Akinfeyevin sifətinə bir neçə dəfə lazer şüası yönəldilməsi matçın translyasiyası zamanı aşkar görünüb. Sonradan Rusiya yığmasının baş məşqçisi Fabio Kapello bəyan edib ki, bu hərəkət qolkiperə mane olub və rəqibin qol vurmasına imkan verib.

Vətəninfo.az