İncə qəlbin incə maraqları

Xoşbəxt o televiziya aparıcısıdır ki, tamaşaçı onu sevir, hər efir görüşünü səbirsizliklə izləyir. Öz dəsti-xətti olan, heç kəsi təkrarlamayan Elnarə Təhməzova məhz tamaşaçının sevdiyi və seçdiyi televiziya aparıcılarındandır. İntellektual səviyyəsi ilə seçilən Elnarə xanımmüzakirə obyektinə çevirdiyi mövzulara həssas yanaşır və çalışır ki, onun üçün ayrılmış efir saatında mövzunu bütövlükdə müzakirə edib tamaşaçıya təqdim etsin.

“İncə+”, “İncə maraqlar” tamaşaçıda xoş bir ovqat yaradır. Aparıcının səmimiyyəti, qonaqlarla xoş rəftarı, tamaşaçıya ötürdüyü müsbət enerji Elnarənin daxili tərbiyyəsindən, ailə tərbiyyəsindən irəli gəlir. Fərqli geyimləri aparıcının yüksək zövqə malik olmasından xəbər verir. Müasir dünyagörüşlü xanım olduğundan müasirliyə daha çox üstünlük verir. Aparıcının hərəkət dinamikası da özünəməxsusdur. Çalışır ki, efir saatında dolğunluq yaratsın, tamaşaçı yorulmasın.

Aparıcının səsi, səsindəki məlahət özü bir şəfadır. Səsi tamaşaçını qıcıqlandırmır, əksinə səsi ilə minləri tilsimə sala bilir. Gözəl xanım, fərqli aparıcı Elnarə Təhməzova hələ neçə-neçə mövzuları incə-incə müzakirə obyekti edib problemlərin həlli yollarında yardımçı olacaq. İncə qəlbin, incə maraqların var olsun!

Araz Hacıyev     

Vətəninfo.az