Nazpərini fanatı təbrik etdi– EKSKLÜZİV FOTOLAR

 Kövrək və sevincli anlar yaşandı Dünən (22 dekabr) Nazpəri Dostəliyevanın 17 illik fanatı bəstəkar-müğənni Arif Səlimov sənətkarın ad gününü təbrik etmək üçün onun evinə yollandı. Vətəninfo.az saytı bəstəkarla sənətkarın görüşünü şəkillərin yaddaşına həkk etdi. Qapının zəngi çalınandan sonra sənətkar qapını özü açdı. Gözləmədiyi sürprizlə rastlaşdı. Arif Səlimov Nazpəri xanım üçün gətirdiyi böyük qızıl gül dəstəsini türk mahnısı olan “Annem”in sədaları altında sənətkara təqdim etdi. Nazpəri xanımın repertuarından mahnılarla fanatı olduğu sənətkarı kövrəltdi. Silsilə duet mahnılar oxundu.

Royal arxasına keçən bəstəkar müğənninin doğum gününə hədiyyə etdiyi “Sev səni sevəni” mahnısını Nazpəri xanıma təqdim etdi. Mahnını dinləyib heyrətlənən sənətkar dedi: “Bunda olan ürəyi heç kimdə görmürəm. Arif 17 ildir ki, mənə sadiqdir, fanatımdır və məni ilk təbrik edən də məhz odur.

Mən bu anı gözləmirdim”. Sevincdən gözləri dolan bəstəkar 17 ilə bir baxış etdi: “Bu gün mən xöşbəxtlərin xoşbəxtiyəm. Fanatı olduğum sənətkarla eyni gündə doğulmuşuq. Nazpəri xanım mənimlə bir bəstəmi duet oxuyub. Bu mənim həyatda ən böyük xoşbəxtliyimdi.

Mən sevdiyim insanlara sürpriz etməyi xoşlayıram və mən həmin sürprizi etdim. Bu yaşadığım anlar üçün Tanrıma minnətdaram”. Biz də eyni gündə doğulan iki sevimli sənət sahiblərini ürəkdən təbrik edirik.

Alim Nəbioğlu

Foto Araz Hacıyev

Vətəninfo.az