“Qarabağ” 263 min avro alacaq

Vətəninfo.az  xəbər verir ki, UEFA avrokuboklarda iştirak edən klublara əlavə pul verəcək. ANS PRESS-in məlumatına görə, bu barədə qurumun İcraiyyə Komitəsinin dünən keçirilən iclasında qərar qəbul edilib. Qərara əsasən "Maliyyə Fair-Play"ına görə klublara verilən cəzalardan toplanan vəsaitin 80 faizi Çempionlar Liqası və Avropa Liqasının qrup mərhələsində iştirak edən klublar arasında bərabər şəkildə bölünəcək. Bu zaman "Maliyyə Fair-Play"ına görə cəzalanmış klublara pay düşməyəcək. Bu il eyni səbəbdən klublar 24 milyon avro cərimə edilib. Avrokubokların qrup mərhələsində iştirak edən 80 klubdan 7-si cəza aldığından cərimələrdən pay ala bilməyəcək. Qalan 73 klub isə 24 milyon avronun 80 faizini - 19 milyon 200 min avroya sahib çıxacaq. Hər klub təxminən 263 min avro alacaq. Onların arasında Avropa Liqasının qrup mərhələsində iştirak edən "Qarabağ" da var. Ağdam klubu indiyədək "Maliyyə Fair-Play"ına görə cəzalanmayıb. Qalan 20 faiz - 4 milyon 800 min avro isə avrokuboklarda mübarizəni dayandırmış klublara veriləcək. 155 klub arasında bölünəcək bu məbləğdən hər birinə təxminən 30 min avro düşəcək.

Vətəninfo.az