"Azərbaycanla oyuna daha ciddi hazırlaşacağıq"

"Oyuna pis başladıq. İlk 15 dəqiqə ərzində topa yiyələnməkdə çətinlik çəkirdik. Lakin Ronaldonun qolundan sonra komandam özünə gəldi".

Qol.Az-ın məlumatına görə, bu sözləri Portuqaliya millisinin baş məşqçisi Paulo Bentu Lüksemburqla keçirilən oyundan sonra (2:1) deyib.

Portuqaliyalı mütəxəssis artıq Azərbaycanla oyun haqda düşündüklərini bildirib: "Lüksemburqla oyunda əsas məqsədimiz 3 xal qazanmaq idi. Lakin bu heç də asan olmadı. 

Rəqib sübut etdi ki, onlar da futbol oynamağı bacarırlar. Buna baxmayaraq, çətin də olsa, qələbə qazanmağı bacardıq. Bu qələbə Azərbaycanla oyunöncəsi yaxşı oldu. Artıq bu oyun haqda düşünürük. Növbəti görüşdə çətinliklə üzləşməmək üçün Azərbaycanla oyuna daha ciddi hazırlaşacağıq".

Qeyd edək ki, Portuqaliya yığması "DÇ-2014"ün seçmə mərhələsində növbəti görüşünü sentyabrın 11-də evdə millimizə qarşı keçirəcək. Həmin oyun Bakı vaxtı ilə saat 00:15-də başlayacaq.