"Qalatasaray"ın futbolçusuna böyük cəza

Türkiyənin "Qalatasaray" klubunun futbolçusu Engin Baytara görülməmiş cəza verilib.

"Vətəninfo.az" Türkiyə mətbuatına istinadən xəbər verir ki, buna Superkubok çərçivəsində "Fənərbaxça" ilə keçirilən oyunda Enginin matçın baş hakimi Cüneyt Çakıra hücum etməsi səbəb olub. 

Matçın 66-cı dəqiqəsində "Fənərbaxça"nın bərabərlik (2:2) qolundan sonra baş hakimə kəskin etiraz edən 29 yaşlı futbolçu qırmızı vərəqə ilə meydandan qovulmuşdu. Hakimin qərarı ilə razılaşmayan Enginin Çakırın üzərinə hücum çəkərək onun yaxasından yapışması futbolçuya baha başa gəlib.

Baş verən epizoda hüququ qiymət verən Türkiyə Futbol Federasiyasının Nizam-İntizam Komitəsi futbolçuya 11 oyunluq cəza kəsib. Engin eyni zamanda komandası tərəfindən də cəzalandırılıb. Belə ki, "Qalatasaray" klubu futbolçunu 165 min avro (hər oyuna 15 min avro) cərimələyib.