SOCAR: Yanğın tam söndürüldü

"Günəşli" yatağında itkin düşmüş neftçilərin axtarışları davam etdirilir.

Bu barədə Publika.az-a "Azneft" İstehsalat Birliyində operativ qərargahından məlumat verilib.

Məlumatda bildirilib ki, axtarışlara Fövqəladə Hallar Nazirliyinin 2 helikopteri, 1 təyyarəsi, Dövlət Sərhəd Xidmətinin 5 gəmisi "Günəşli”, "Şahdəniz”, "Ümid” yataqları, Çilov adasının şimal-qərb istiqamətində axtarışları davam etdirir. Bu saata qədər isə itkin düşənlərdən tapılan olmayıb.

Yataqda yanğının söndürülməsi üçün 3 gəmi cəlb olunub, 2 gəmi isə ehtiyatda gözləyir. Bundan başqa, xarici mütəxəsislər ”Şıxlinski” gəmisində yanğının söndürülməsi üçün avadanlıqların quraşdırılması üzərində işləyir. İşlər başa çatandan sonra onlar da yanğının söndürülməsinə başlayacaqlar.

SOCAR-ın mətbuat xidmətinin rəhbəri Nizaməddin Quliyev Trend-ə bildirib ki, "Günəşli" yatağındakı yanan 10-cu özüldə neft quyuları tam söndürülüb.

Onun sözlərinə görə, bu, mümkün neft dağıntılarına görə ekoloji fəlakətin qarşısını tam almağa imkan verdi. Yanan qaz quyularının söndürülməsi yekun mərhələdədir.

N.Quliyev bildirib: "Biz onları qısa müddət ərzində söndürməyə çalışırıq. Yanğın söndürüldükdən sonra platforma yenidən qurulacaq. Bundan sonra quyular yenidən istismara veriləcək".