“UAK 5-10 qohumun ailəvi diasporu”

Ukraynanın Xarkov şəhərində yaşayan həmyerlimiz Eldar Ələsgərov Vətəninfo.az-ın redaksiyasına müraciət edərək Ukraynadakı Azərbaycan diasporasının fəaliyyətsizliyindən şikayətlənib.

Oxucu bildirib ki, hansısa məmurun yol verdiyi qüsurları bu dövlət üçün çalışanların əməyinə xəyanət hesab edir: “Ümummilli liderin səyləri nəticəsində dünyanın bütün ölkələrində Azərbaycan diasporu yarandı və hazırda da çox uğurlu şəkildə fəaliyyət göstərir. Amma bəzən diaspora xidmətini həyata keçirən insanlar arasında yanlışlıqlara yol verənlər olur. 20 ilə yaxındır ki, məskunlaşdığım Ukraynanın Xarkov şəhərində diaspora xidmətimizin işinə laqeyd münasibəti həmvətənlərimiz üçün bir sıra çətinliklər yaradır.

Ukrayna Azərbaycanlıları Konqresi ətrafına yığdığı 5-10 qohum ailəyə diaspor adını verib. İmkanlı adamlarımız gələn qonaqlarını erməni restoranlarında-separatçı bayrağı altında müsafir edirlər. Erməni millət vəkilləri, prokurorluq orqanlarında, səhiyyədə çalışanları qarşımıza maneələr çıxarır. Lakin diasporanın önə çıxardığı qabiliyyətsiz insanlarhəmvətənlərimizin müdafiəsində acizdir. Ermənilər “Ağdam” restoranında həmyerlilərimizi döyür, amma diasporalarının fəaliyyəti sayəsində cəzasız qalırlar.

UAK Azərbaycan, Dağlıq Qarabağla bağlı təbliğata da ciddi yanaşmır. Saytında xəbərləri 2010-2011-ci ildən təzələnmir. Dövlətin mövqeyi yüksək vəzifəli ermənilərlə dostluqdan irəli gələn şəxsi mənfəətə qurban verilir”.

Vətəninfo.az