YARI QAÇQIN OLAN MİLLƏT

Vahid Aslan

... Al bayrağın kölgəsində,

Köləlikdə solan millət!

Əzəli – od ölkəsində,

Od-ocaqsız qalan millət!

Azadlıq ki, əldən getdi,

Sən yaşayan ömür bitdi,

Kim səni vətənsiz etdi,

Yarı qaçqın olan millət!

Ox atmağa kamanın yox,

Bu məlalı qananın yox,

Ağlamağa zamanın yox,

Içi dərdlə dolan millət!

Gör kimin dalınca getdin,

Hər nə etdin özün etdin,

Torpaqları düşkün, itkin,..

Var-dövləti talan millət!

Ağası zalım olanın,

Axı, bir gün coşar qanı!

Sonuncu nifrətin hanı?

Ümidi qırılan millət!

Birləşib də güc olmalı,

Köləliklə öc olmalı,

Özü də uca olmalı,

Bayrağı ucalan millət!