Bakının mərkəzinə polis qüvvələri yeridilib

Xəbər verildiyi kimi, bu gün İctimai Palata (İP) Bakı Şəhər İcra Hakimiyyətinin (BŞİH) binası qarşısında piket keçirəcək.

Piket üçün BŞİH-yə bir həftə əvvəldən müraciət edilsə də, İP-ə mənfi cavab verilib, 6 maya təyin olunmuş mitinqlə bağlı müraciətə verilən cavab məktubunda 7 mayda piket keçirilməsinin məqsədəuyğun olmadığı yazılıb.
Əməkdaşlarımızın şəhərin mərkəzi hissəsindən verdikləri xəbərə görə, artıq polis qüvvələri Fəvvarələr bağından tutmuş Bakı Şəhər İcra Hakimiyyətinin yerləşdiyi küçəyə qədər bir çox küçələri nəzarətə götürüb. Müxalifətin etiraz piketinin qarşısını almaq üçün çox sayda polis qüvvələri səfərbər olunub. Bundan başqa, ətrafda çoxlu mülki geyimli hüquq-mühafizə orqanlarının əməkdaçları da gözə dəyir.
Əməkdaşlarımızın veridiyi xəbərə görə, onlar Bakı Şəhər İcra Hakimiyyətinin başçısı Hacıbala Abutalıbovu BŞİH binasında çıxıb harasa gedərkən görüblər. Jurnalistlər şəhər rəhbərinə yaxınlaşaraq ona bugünkü piketlə bağlı sual vermək istəyərkən Abutalıbov onlara cavab verməyib və sözün birbaşa mənasında qaçaraq uzaqlaşıb.
Onu da qeyd edək ki, müxalifət piketin nə vaxt, günün hansı saatında keçiriləcəyi barədə məlumat açıqlamayıb. Bununla belə, güman olunur ki, aksiya saat 12 radələrində baş tuta bilər.

Musavat.com