“Bir neçə qadın icra başçısından ev tələb edib” - Deputat

Bu gün İmişli rayonunda etiraz aksiyasının keçirilməsi ilə bağlı xəbərlər və fotolar yayılıb. 

İmişlinin millət vəkili Çingiz Qənizadə bununla bağlı xəbər portalarına açıqlama verib.

Ç. Qənizadə bildirib ki, bu məlumat ilk olaraq Turan İnformasiya Agentliyində yayılıb: “Məsələ ilə bağlı Rayon İcra Hakimiyyəti və vəzifəli şəxslərlə əlaqə saxladım. Aydın oldu ki, bu gün evləri qəzalı şəraitdə olan bir neçə qadın İmişli Rayon İcra Hakimiyyətinin binasına gəlib. Onlar yeni ev verilməsini tələb ediblər”.

Millət vəkili onu da qeyd edib ki, təbii ki, İcra Hakimiyyətinin ev vermək səlahiyyəti yoxdur, bu işlə birbaşa Fövqaladə Hallar Nazirliyi məşğul olur: “Mətbuatda yayılan fotolar isə bu gün çəkilməyib. Düşünürəm ki, bu qərəzli bir hərəkətdir. Xəbəri dəqiqləşdirmədən mətbuata çıxaran KİV-ə təəssüf edirəm. Hazırda İmişli rayonunda sakitlikdir, heç bir hadisə baş verməyib”.