“Deputat olmaq istəmirəm”

Əkrəm Abdullayev: “Bank sektorunda çalışıram, yenidən siyasətə qayıtmaq niyyətim yoxdur”

Editor.az sabiq millət vəkillərini oxucularla görüşə gətirir. Portalımız vasitəsilə oxucular keçmiş deputatların hazırda nə işlə məşğul olmalarına aydınlıq gətirəcəklər.

Saytın növbəti qonağı 59 saylı Salyan seçki dairəsini parlamentdə təmsil etmiş sabiq millət vəkili, “AGBank”ın administrativ departamentin direktoru Əkrəm Abdullayevdir.

Xatırladaq ki, Əkrəm Abdullayev deputat seçilənə qədər ictimai fəaliyyətlə məşğul olub və Gənclər Təşkilatları Milli Şurasına rəhbərlik edib.

Hazırda iqtisadi sahədə çalışdığını deyən sabiq millət vəkili Əkrəm Abdullayev bildirdi ki, artıq bu sahəyə tam adaptasiya olunub və işindən məmnundur:“Hazırda bank sektorunda çalışram. “AGBank”ın mərkəzi aparatının rəhbəriyəm. Bu müddət ərzində bu sahəyə adaptasiya oluna bilmişəm və işimdən hər hansı narazılığım, gileyim də yoxdur”.

Hazırda siyasi fəaliyyətlə məşğul olmadığını deyən Əkrəm Abdullayev nə zamansa yenidən deputat olmaq niyyətində olmadığını da söylədi: “Deputat olmaq istəmirəm. İctimai-siyasi fəaliyyətə ümumiyyətlə geri dönmək fikrim yoxdur. Bu artıq keçmişdə qalıb. Uzun illər bu sahədə fəaliyyət göstərib, ciddi təcrübə qazansaq da, hazırda iqtisadi sektorda çalışmağı daha üstün tuturam”.