Əlimdə son kibritim

Ramiz Rövşən

Əlimdə son kibritim

Söndü sənin ahından.

Səni öpdüm, kiritdim,

Dedim: keç günahımdan.

Ay işığı bulaşdı

Gözlərinin yaşına.

Sən məni bağışladın 

Bəlkə ay işığına.

Qaranlıqda oturduq

Biz üz-üzə, diz-dizə.

Nə mən sənə baxırdım,

Nə sən mənə...

Nə isə...

Bu gecəni varağa 

Yazmaq olmaz-günahdı.

Bu gecə keçdi daha,

Aç gözünü, sabahdı.

Bir azca gecə qalıb 

Gözlərinin içində.

O da uçub gedəcək,

Sən gözünü açanda.

Bu gecənin sirrini

Yuyacaq bu dəniz də.

Bizdən bu qumlar üstə,

Qalmayacaq bir iz də.

Balıqlar danışacaq

Bu sirri bir-birinə.

Balıqlar daşıyacaq

Bu sirri lap dərinə,

Lap dənizin dibinə...

...Balıq dili bilən yox,

Bu sirrin səsi çıxa.

Bu dəniz quruyanda

Sirrimiz üzə çıxa...