“Elşad Abdullayev gəncləri mənəviyyatsızlaşdırır”

Mayis Güləliyev: “Elşad Abdullayev bəlası xalqımızın bütövlükdə bəlasıdır”

“Elşad Abdullayevin dedikləri və göstərdikləri hamıya bəlli olan məsələdir. Yenilik ondan ibarətdir ki, o digərlərindən daha hiyləgər tərpənib bütün bu eybəcərlikləri lentə alıb”.

Bunu Vətəninfo.az-a Elşad Abdullayevin yaydığı videoları və ölkənin siyasi gündəmini şərh edən Azərbaycan Yaşıllar Partiyasının sədri Mayis Güləliyev bildirib.

M.Güləliyev deyib ki, Elşad Abdullayevin özu daha ağır qanunsuzluqlara yol verib.

“Minlərlə cavan insanı şikəst edib və mənəviyyatsızlaşdırıb. Təhsildə görünməmiş rüşvət və qanunsuzluq mühiti yaradıb. Onun bu dedikləri və yaydıqları hamıya bəlli olduğundan, ictimai faydalı deyil və ola da bilməz. Bəla bu hadisədən sui-istifadə edib özünə siyasi divident qazanmaq istəyənlərin boş və mənasız canfəşanlıqlarıdı. Bu insanlar bu problemin kökünü axtarmağa calışmalıdırlar. Onlar isə bunu hakimiyyətlə bağlayırlar”.

Yaşılların sədrinə görə, Elşad Abdullayev bəlası xalqımızın bütövlükdə bəlasıdır: “Belə ki, Azərbaycanda yaşayan insanların əksəriyyəti potensial Elşad Abdullayevdir. Ruşvət maşınında işləmək imkanı olan və rüşvət almaqdan imtina edən neçə nəfər göstərmək olar bu məmləkətdə? Bir, iki, üç nəfər. Bu bəla daha ciddi yanaşma tələb edir”.

Kənan

Vətəninfo.az