Elşad Abdullayev jurnalistlərə "şirin" vədlər verir - EKSKLÜZİV

Vətəninfo.az-a Fransadakı soydaşlarımızdan daxil olan məlumata görə, hazırda Fransada sığınacaq tapan ABU-nun sabiq rektoru Elşad Abdullayev özünə yeni peşə seçib. Verilən məlumatda bildirilir ki, Fransanın rəsmi dairələrindən hələ də rəsmi olaraq siyasi sığınacaq ala bilməyən E.Abdullayev Azərbaycanda hakimiyyətə qarşı müxalif mövqedə dayanan bəzi şəxslərə Fransaya gələcəkləri təqdirdə onlara siyasi sığınacağın alınmasında köməklik edəcəyini vəd edir.

Mənbənin iddiasına görə, bu məsələdə E.Abdullayevə hazırda Fransada siyasi mühacir olan müxalif düşərgədən olan insanlar dəstək verirlər. Bu dəstək isə ondan ibarətdir ki, E.Abdullayevin əlində olan videoları məhz Azərbaycanda fəaliyyət göstərən müxalifyönlü saytlar yayır.

Elşad Abdullayev də bu şəxslərin sözünə inanaraq Azərbaycandakı bəzi mətbuat təmsilçilərinə siyasi sığınacaq vəd edir.

Mənbənin sözlərinə görə, tez-tez ünvanını dəyişən sabiq rektor bu yolla həmin mətbuat işçilərini tərəfdarları sırasına cəlb etmək istəyir.

Elşad Abdullayevin də məlumatla bağlı münasibətini dərc etməyə hazırıq.

Vətəninfo.az