Hüseynbala Mirələmov: “Məni istəməyən Əli Kərimli və İsa Qəmbərdir” - MÜSAHİBƏ

Millət vəkili Hüseynbala Mirələmov Parlament jurnalistlərinə müsahibə verib. Həmin müsahibəni təqdim edirik:

-Millət vəkillərinin irəli sürdüyü “Sərbəst toplaşmaq azadlığı haqqında” qanuna dəyişiklik barədə nə deyə bilərsiz?

-Mən hüquqşünas deyiləm, mühəndisəm. Parlament nə edirsə, düzdür. Qanunlara uyğun hərəkət etmək lazımdır. Siz onları məndən gözəl bilirsiz. Müəyyən qaydalara uyğun hərəkət edilməlidir. Kim harada gəldi, aksiya keçirə bilməz.

-Oğlunuzun iş yerini itirdiyinə dair bir açıqlama verə bilərsiz?

-Bəli. Daxili İşlər Nazirliyinin nizamnaməsinə uyğun rayonlarda yoxlamalar keçirilir. Mənim oğlumun da çalışdığı yerdə yoxlamalar aparılıb. Görünür, nöqsanları çox olduğundan nazirlik onu sərəncama götürüb.

- Bunun törədilən qanlı hadisə ilə bağlı əlaqəsi yoxdur ki?

-Qətiyyən. Ehsan Zahidov da açıqlamasında bildirir ki, bunun heç bir şeylə əlaqəsi yoxdur.

- Amma oğlunuz hadisə baş verən yerdə olub...

- Xeyr, olmayıb.

- Axı, bu barədə özünüzün açıqlamanız var...

-Düz demirsiz... Mən açıqlamamda demişəm ki, biz gecə yatmışdıq. Oğlum qapını döydü. Dedi ki, hadisə baş verib, gedək ora... Bütün qəzetlər yalan yazır. Və yalan yazanlara sadəcə yazığım gəlir.

- Belə bir xəbərlər yayılır ki, hökumət daxilində sizi “bitirmək” məsələsi var...

- Məni istəməyən qüvvələr yalnız Əli Kərimli və İsa Qəmbərdir.