Prezident İsmayıllıya gedəcəkmi?

Son günlər İsmayıllı rayonu ətrafında baş verən proseslər bir qədər də ciddiləşib. Rayon demək olar ki, tam şəkildə polis nəzarəti altındadır. Hazırda rayonda hər hansı fəallıq hiss olunmur. Yeni aksiyanın keçirilib-keçirilməyəcəyi ilə bağlı heç bir məlumat yoxdur.

FaktXəbər-in yaydığı məlumata görə, Azərbaycan prezidenti İlham Əliyevin bu gün axşam saatlarında İsmayıllı rayonuna səfəri nəzərdə tutulub. Prezidentin şəxsən hadisə yerində olub, baş verənlərlə tanış olmaq, əhali ilə görüşmək istədiyi bildirilir.

Mənbə qeyd edib ki, Prezidentin Avropadakı sıx görüş qrafikinə baxmayaraq, o, artıq Bakıya dönmək barədə hazırlıq tapşırığı verib. İsmayıllıya səfərin isə sabah səhər saatlarında baş tutma ehtimalı da var.

Qeyd edək ki, İlham Əliyev Davosda səfərdədir. Onun Bakıya qayıtması ilə bağlı hələlik heç bir məlumat yoxdur.