Prezidentin açılışını etdiyi xəstəxanada otaqlar satılır

Vətəninfo.az-a İmişli rayonundan daxil olan məlumata görə, ötən ilin oktyabr ayında ölkə prezidenti İlham Əliyevin açılışını etdiyi İmişli Mərkəzi Xəstəxanasında baş həkim Cəsur Paşayev "möhtəşəm" bir bazar açıb.

Verilən məlumata görə,baş həkim Cəsur Paşayev yeni istifadəyə verilən Mərkəzi Xəstəxanada işləmək istəyən həkimlərə 1500-2000 AZN-nə kabinetləri satmağa başlayıb. Pul  verməyən həkimlərə isə "Gedin köhnə xəstəxanada işləyin" deyir.

Bildirilir ki, Cəsur Paşayevin baş həkim təyinatından sonra rayonda şəkərli-diabet xəstələri üçün nəzərdə tutulan insulinlər xəstəxanada yoxa çıxıb və daha çox xəstəxanaya ayrılan həmin preparatlar apteklərdə satılır. Xəstələr dərmanla təmin olunmaları ilə bağlı müraciət etsələr də onlara "dərman yoxdu" deyilir.

Daxil olan məlumatla bağlı İmişli Rayon Mərkəzi Xəstəxanasının baş həkimi Cəsur Paşayevlə əlaqə saxlamaq istəsək də baş həkimin yerində olmadığı bildirildi.

Redaksiya olaraq, qarşı tərəfin də mövqeyin dərc etməyə hazırıq.

Kənan

Vətəninfo.az