Qabil Hüseynli: “Morninqstar regiona bələd olan biridir”

ABŞ-ın Azərbaycana səfir postuna irəli sürdüyü namizədi barədə “Vətəninfo.az” saytına açıqlama verən politoloq Qabil Hüseynli R.Morninqstarın uğurlu təyinat ola biləcəyini bildirib: “R.Morninqstar vaxtilə ABŞ-ın enerji məsələləri üzrə dövlət müşaviri işləyib. “Nabucco” qaz boru kəməri layihəsinin, ondan əvvəl isə Xəzər neftinin problemləri ilə ciddi sürətdə məşğul olmuş bir şəxsdir. Neft və qazla bağlı ABŞ-ın bu sahədəki siyasətini formalaşdıran dövlət müşaviridir”-deyə, vurğulayıb.

Politoloq əlavə edib ki, R.Morninqstar regiona və oradakı qüvvələr nisbətinə bələd olan, ABŞ-la əməkdaşlıq məsələlərində neqativ və pozitiv məqamları yaxşı öyrənmiş biridir: “Regionda onun 10 ildən çox müddətdə işləmək təcrübəsi var. Eyni zamanda Azərbaycan siyasətçilərini, rəhbərliyini də gözəl tanıyır. Fikrimcə, onun Azərbaycana səfir təyin olunması ABŞ Azərbaycan münasibətlərinə töhfə verə bilər. Həmçinin bölgədə bir çox iqtisadi layihələrin formalaşmasına da kömək edə bilər”-deyə fikrini tamamlayıb.

Ramilə