“Bank Standard” dünya birjalarında əməliyyatlarda iştiraka başladı

“Bank Standard” Azərbaycanda ilk dəfə olaraq dünyanın 25-dən çox birjasında maliyyə əməliyyatlarında iştirak etmək üçün xidmət göstərməyə başlayıb. Bankın mətbuat xidmətindən “Vətəninfo.az”-a verilən məlumata görə, əməliyyatlar onlayn rejimində avropanın məhşur sərmayəçi bankı tərəfindən yaradılan müasir, yüksək texnologiyalı “Bank Standard Trader/WebTrader/ Mobile Trader” ticarət platformalarında həyata keçirilir. 

“Bank Standard” müştərilərin sərəncamına dünya maliyyə bazarlarında aşağıdakı kateqoriyalar üzrə ticarət əməliyyatları aparmağa imkan verən qabaqcıl texnologiya və maliyyə alətlərini təqdim edir: Forex- 160-dan çox valyuta cütlüyü, Səhmlər- 11.000-dən çox səhm, CFD – 6000-dən çox müqavilə, Fyuçers- 15 dünya birjasından 450 müqavilə növü, Opsionlar və digər derivativlər.

“Bank Standard” Trader/WebTrader/Mobile Trader istifadədə sadə treydinq platformalarıdır. Bu platformalar vahid interfeys çərçivəsində gündə 24 saat ərzində istənilən kompüterdən və ya mobil telefondan ticarət əməliyyatları aparmağa, qiymətlərin dinamikasının monitorinq və təhlilini həyata keçirməyə və analitik icmal əldə etməyə imkan verir. Onlar heç bir yükləmə və ya quraşdırma tələb etmir.

Oral MƏDƏNÇİ